डाएट कटलेट

साहीत्य-१/२ वाटी ओट्स,१/२ वाटी कणीक,आलं ,मिरची, लसूण पेस्ट,कोबी,गाजर,कांदा,ढोबळी मिरची कांद्याची पात
कृती- वरील सर्व भाज्या अगदी बारीक चिरुन घ्याव्यात.त्यात आलं,लसूण,मिरची ची पेस्ट घालावी,त्यात दोन्दी पीठ घालावीत व चवीप्रते मीठ घालून चांगले मळून त्याचे चपटे गोल करून घ्यावेत. नॉनस्टिक तव्यावर ते काही न घालता उलटे पालटे करावेत.व पुदीना आणि कोथिंबीरीच्या चटणीबरोबर खावेत.

व्हेज बिर्याणी

साहीत्य-बिर्याणीचा तांदूळ,मटार,फ्लॉवर,गाजर, श्रावणघेवडा,ढोबळी मिरची,बटाटा,कांदा,कोथिंबीर,पुदीना,मिरची,आलं,लसूण,गरम मसाला,तूप,मीठ,लवंगा,हीरवी वेलची,काजू.
कृती- प्रथम तांदूळ धूवून घेऊन तो तुपावर चार,पाच लवंदा व दोन तीन हीरवी वेलची घालून मोकळा शिजवून घ्यावा. तो पसरुन परातीत वेगळा गार करायला ठेवावा.पातेल्यात तूप घेऊन त्यात वरील सव भाज्या( कांदा सोडून ) बारीक चिरुन परताव्यात. पातेल्यावर झाकण थेवावे.भाज्या शिजत आल्यावर त्यात गरम मसाला,हीरवे वाटण( कोथिंबीर+मिरची+पुदीना+आलं+लसूण),मीठ घालून चांगले परतावे.दोन चमचे तूप सोडावे.नंतर हा गार झालेला मोकळा भात त्यात घालून एकत्र हलवावे.त्यावर कांदा (बारीक उभा चिरुन तेलावर तांबूस रंगावर परतलेला)पसरावा.व तूपावर परतून घेतलेले काजू घालावेत.

चकली

साहित्य - तांदूळ -- ४ वाट्या, हरबरा दाळ -- २ वाट्या, उडदाची दाळ -- १ वाटी, धणे -- २ वाट्या, तिखट, मीठ, ओवा, तीळ, तळणीसाठी तेल आणि सोर्‍या.

चकली भाजणी --
तांदूळ, हरबरा दाळ, उडदाची दाळ आधी धुवून (दोन, तीन वेळ धुवून) पसरायचे, थोड्या वेळाने (ओल्या असतानाच) दोन्ही दाळी खमंग भाजायच्या, तांदूळ गरम होईपर्यंत भाजायचे. धणे भाजून घ्यायचे. जाडसर पीठ दळून आणायचे.

आठ वाट्या भाजणीचे पीठ घेतल्यास त्यात एक वाटी कढत तेल टाकायचे, चवीप्रमाणे तिखट, मीठ, तीळ आणि ओवा घालायचे. नंतर गार पाण्याने पीठ चांगले मळायचे. पंधरा/वीस मिनिटे भिजू द्यायचे. सोर्‍यात घालतानाही मळून घालायचे.

कागदावर चकली घालून घ्यायची. तेल कढत तापल्यावर गॅस कमी करून साधारण मध्यम आचेवर चकल्या रंग बदलेपर्यंत तळून घ्यायच्या.

(चकलीच्या मधून नळी पडली असेल तर चकली खुसखुशीत होते.)

फोडणी

फोडणीचा शोध लावलेल्या माणसाबद्दल मला फार आदर आहे.

कढईत थोड तेल घ्याव. त्यात थोडी मोहोरी टाकावी. मोहोरी तडतडायला लागेली की मग जिरे, हिंग, हळद, तिखट टाकावं. जरुरीप्रमाणे मिरच्या, कढिलींब,कांदा टाकावा. मस्त फोडणी तयार. आता यात टाकत असलेल्या पदार्थांचा क्रम बदलला तर चवित फरक पडतो का? ते पहावे लागेल. पण कढईतली फोडणी, तव्यावरची फोडणी, लोखंडी पळीतली फोडणी यानी मात्र चवित फरक पडत असावा. आंबाड्याच्या भाजीला लोखंडी पळीतली फोडणी वरुन टाकल्याने काय झक्कास चव येते. फोडणीत हे वेगेवेगळे पदार्थ टाकताना काय मस्त आवाज येतात. फोडणी शिवाय पदार्थ याचा मी विचारच करु शकत नाही.

फोडणीचे हे मिश्रण शोधणारीला/ शोधणार्‍याला माझा साष्टांग नमस्कार....

साठोरी

साहित्य -
सारणासाठी - १/२ किलो खवा, १/२ किलो बारीक रवा, १ किलो पिठीसाखर, १२ वेलदोडे.
पारीसाठी - ६ वाट्या बारीक रवा, ६ वाट्या मैदा, दीड वाटी तेल मोहनासाठी, मीठ, दूध.
तळण्यासाठी - १/२ किलो साजूक तूप

कृती - खवा खमंग भाजून घ्यावा. रवा कोरडाच भाजावा, रव्याचा रंग बदलू देऊ नये. गार झाल्यावर खवा, रवा, पिठीसाखर आणि वेलदोड्याची पूड एकत्र करून एका डब्यात घालून ठेवावे. हे सारण किमान एक दिवस मुरू द्यावे. ( दोन - तीन दिवसही चालेल.)
दुसर्‍या दिवशी रवा-मैदा एकत्र करून त्यात कडकडीत तेल घालावे. अर्धा चमचा मीठ घालून दुधात घट्ट भिजवावे. हे पीठ चार - पाच तास भिजू द्यावे.
करण्यापूर्वी मिक्सरमधून काढून मऊ करावे. गरज पडल्यास चमचाभर दूध घालावे. पारीसाठी लाट्या करून ठेवाव्यात.
सारणाचे त्याच आकाराचे लाडू करून ठेवावेत.
पारी जरा जाडसरच लाटावी . त्यात सारणाचा लाडू ठेऊन नीट बंद करावी. मग अधर लाटावी. अर्धा इंच जाडी उरेपर्यंत लाटावी.
अशा लाटलेल्या साटोर्‍या तव्यावर गुलाबीसर रंगात दोन्ही बाजूंनी भाजून घ्याव्यात. (तूप सोडायचं नाही.)

एकीकडे कढईत तूप तापवत ठेवावे. कडकडीत तापल्यावर गॅस कमी करावा.
मंद आचेवर भाजलेल्या साटोर्‍या तळून घ्याव्यात.

( एकवाटी (अर्धी वाटी रवा + अर्धी वाटी मैदा) पीठात मध्यम आकाराच्या साधारण पाच-सहा साटोर्‍या होतात.)
साटोर्‍या तुपाशी खातात.


( मिलिन्दकडे ”साठोरी" म्हणतात. आत साठा केलेला असतो म्हणून??
”साटोरी’ हा शब्द अधिक वापरला जातो. ’सांजोरी’ असंही म्हणतात.)

शाही फालुदा

साहित्य : रोझ सरबत, दुध, साय, सब्जाचे बी, जाड शेवया, बदाम, काजु, बेदाणे, व्हॅनिला आईस्क्रीम

कृती: प्रथम दुधात रोझ सरबत घालून थोडी साय टाकून मिश्रण मिक्सर मधून फिरवून घ्यावे व थंड होण्यासाठी फ्रिज मध्ये ठेवावे. सब्जाचे बी पाण्यात भिजत घालावे. शेवया उकडून त्या थोड्या केशर पाण्यात भिजवून घ्याव्यात. बदाम व काजू किसून घ्यावेत.

ग्लास मध्ये फालुदा बनवताना पहिल्यांदा शेवया टाकाव्यात. त्यावर सब्जाचे बी टाकावे. नंतर त्यात अर्धा ग्लास भरेल इतका रोझ मिल्कशेक टाकावा. त्यावर किसलेले बदाम व काजु टाकावेत. त्यावर व्हॅनिला आईस्क्रिम टाकावे. वरुन पुन्हा रोझ मिल्कशेक टाकावा. वरुन थोडेसे रोझ सिरप आणि बेदाणे टाकून खायला (का प्यायला) द्यावे.

गूळभात

साहित्य - १ वाटी तांदूळ, १ वाटी गूळ, १ वाटी नारळाचा किस, तीन चमचे साजूक तूप, दोन लवंगा, दोन चिमूट वेलदोड्याची पूड, १० काजू.
वेळ -३५  मिनिटे ,
किती जणांसाठी? - ४ ते ५ माणसांसाठी
कृती -
१) तांदूळ धुवून घ्यावेत, १ वाटी तांदळासाठी ( कोलम) १वाटी पाणी घालावे. कुकरमधे दुसर्‍या डब्यात नारळाचा किस ठेवावा. भात शिजवून घ्यावा.
२) भात ताटात/ परातीत काढून पसरवावा. त्यावर एक चमचा तूप घालावे.
३) कढईत दोन चमचे तूप घालावे. तूप कडकडीत झाल्यावर त्यात दोन लवंगा टाकाव्यात, नंतर भात घालावा. भात नीट हलवला की लगेच नारळाचा किस घालून हलवावे. नंतर गूळ मिसळावा.
४) भाताला दोन वाफा आणाव्यात.
५) वरून वेलदोड्याची पूड आणि काजूचे तुकडे घालावेत व गरम गरम ’गूळभात’ वाढावा.

तुम्ही कधी तिरूपतीला गेला आहात का? तिथे प्रसादाचा जो गूळभात मिळतो... अप्रतिम! तिथे भाविक देवाला वेगवेगळी घंगाळं बोलतात. जर कोणी गूळभाताचा प्रसाद दाखवला असेल तर ...घंघाळभर गूळभाताचा व्यंकटेशाला नैवेद्य दाखवतात. नेमके आपण तेव्हाच दर्शन घेऊन बाहेर पडत असू तर.... द्रोणात गूळभात मिळतो. असा गूळभात खाल्यावर पुन्हा देवदर्शनाच्या रांगेत उभं राहायचा मोह मला झाला होता.
समजा तुमच्यावेळी नसेल गूळभात तर निराश होऊ नका. दहीभात असेल किंवा तीळभात असेल, चित्रान्न असेल......... वा! .....जो प्रसाद असेल तो ! तुम्ही चाटून पुसून खाल याची खात्रीच!

आईस्क्रीम विथ ब्रॅन्डी

साहित्य: व्हॅनिला आईस्कीम, ब्रॅन्डी

व्हॅनिला आईस्क्रीम वर एक चमचा ब्रॅन्डी टाकावी. ब्रॅन्डी च्या ऐवजी रम सुध्दा चालेल. खायला खूप भन्नाट लागते.

पम्पकिन ज्यूस (हॅरी पॉटर खासियत)

साहित्य: पाव किलो लाल भोपळा,
दोन तीन सफरचंदे आणि एक अननस (किंवा ’ट्रॉपिकाना’चा तयार पाईनॅपल आणि अ‍ॅपल ज्यूस : प्रत्येकी २०० मिली),
मध,
मिरपूड, जलजीरा किंवा चाट मसाला यापैकी जे आवडत असेल ते.
कृती:
भोपळा बारीक चिरून अथवा किसून घेऊन तो मिक्सरमधून काढावा. त्यात दोन भांडी पाणी घालून त्याचा रस गाळून घ्यावा. यात सफरचंद आणि अननसाचा रस मिसळावा (प्रत्येकी २०० मिली). यात चवीनुसार दोन किंवा तीन चमचे मध मिसळावा. आपल्या आवडीनुसार त्यात मिरपूड, जलजीरा किंवा चाट मसाला घालावा. (हे घातले नाही तरी पम्पकिन ज्यूस मिश्रण मस्त लागते.) हे सर्व मिश्रण नीट ढवळून घ्यावे
आणि प्यावे / प्यायला द्यावे

Mussels in White Wine and Garlic

serves 2

1-1/2 kilo mussels
3 T. parsley
sm. stalk of celery with leaves
1 medium onion
4-6 cloves of garlic
300 ml. white wine

If they are not already prepared, remove the 'beards' from the mussels by firmly pulling out and towards the hinge. Remove any barnacles growing on the shells with a small knife, or rub them firmly together under cold running water. Test any mussels that are open by tapping them. If they close, they are still fresh. If they do not, discard.

Chop the onion finely and mince the garlic. Sauté the onion and garlic for a few minutes. Add the wine and 2 T. of the parsley bring to the boil, drop in the mussels and give a good stir first before covering. Steam until they open (just a few minutes). Discard any that do not open.

Lift out with a skimmer and place in large deep plates (soup plates) and pour over the sauce. Sprinkle over the parsley before serving and serve with plenty of bread to soak up the delicious sauce or as the Belgians prefer, with a large serving of French Fried Potatoes!

कारल्याची भाजी

पाव किलो कारली, तेल- ६ टेबल स्पून, फोडणीच साहित्य, सुक खोबरं किसलेलं- पाऊण वाटी, दाण्याचा कुट - चार टेबल स्पून, मिरची, चिंचेचा कोळ/सॉस, गूळ, मीठ

कारली आयताकार तुकडे (छोटे) करुन चिरणे. (बिया काढून टाकणे). कढईमधे पाणी घेणे, त्यामधे हळद व मीठ टाकणे व कारल्याचे तुकडे टाकून ते उकळून घेणे. तुकडे बोटाने मोडले जातील इतपत शिजवणे. त्यानंतर चाळणीतून गाळणे व परत दाबून पाणी काढणे म्हणजे कडूपणा कमी येतो. फोडणी करणे, मिरची टाकणे - शिजवलेली कारली टाकणे - त्यावर तिखट पण टाकणे (रंग छान येतॊ) मीठ, सुक खोबरं, कुट, चिंच, गूळ टाकून भाजी परतावी. ती शिजलीच असते फक्त अजून खमंग करावी. भाजी तय्यार.

* इथे चिंच, गूळ, मीठ ह्याच्याप्रमाणाचा उल्लेख केला नाही कारण ते सर्वांना माहीत असेल असे ग्रुहित धरले आहे.

* एकंदरीतच मुबलक प्रमाणात तेल, खोबरं, कुट आहे ह्याचा विचार करता तब्येत आणि जिभेची चोचले ह्याची सांगड कशी घालायची आणि त्याची वारंवारिता किती ठेवायची हा ज्याचा त्याचा प्रश्न आहे.

गोड दिवे

साहीत्य- कणीक, गूळ, पाणी
कृती-पाण्यात गूळ टाकून पाणी उकळवणे.व त्या गूळाच्या पाण्यात मावेल तेवढी कणीक घेऊन घट्ट भिजवणे. व त्याचे फोटोत दाखवल्याप्रमाणे छोटे छोटे दिवे करुन घेऊन त्यांना चांगली वाफ आणावी. नंतर प्रत्येक दिव्यात भरेल एवढे तूप घालून गरम गरम खावेत.

मोदकाची आमटी

मोदकाच्या पारीसाठी साहीत्य- डाळीचे पीठ १ वाटी,तिखट, मीठ, हींग, हळद.डाळीच्या पीठात सांगितलेले साहीत्य घालून थोड्या पाण्यात तेलाचा हात लावून घट्ट गोळा करणे.
सारणासाठी-सुके खोबरे कीसलेले( सुक्या खोब-याची अर्धी वाटी),खसखस १ चमचा भाजून बारीक केलेली,तिखट-मीठ चवीप्रमाणे,बारीक चिरलेली कोथिंबीर, चिमूटभर साखर.हे मिश्रण एकत्र करावे.
पारीसाठीचे भिजवलेले पीठ पुरीपेक्षाही निम्मी लाटी घेऊन त्याची उकडीचे मोदक भरुन घेतो तश्या पद्धतीने तयार सारण भरुन छोटे छोटे मोदक यार करुन घ्यावेत.
ग्रेव्हीसाठी-कांदा एक उभा चिरुन,खोबरे कीसलेले अर्धीवाटी,शेंगदाणे अर्धी वाटी, लसूण ५ ते ६ पाकळ्या, तीळ अर्धी वाटी.सर्व साहीत्य एकएक करुन तेलावर परतून घ्या. व थंड झाल्यावर मिक्सरमध्ये बारीक वाटून त्याची पेस्ट करा.
पातेल्यात फोडणीसाठी तेल घेऊन त्यात मोहरी, हिंग घालून खमंग फोडणी करा. नंतर ही वाटलेली पेस्ट चांगली परतून घ्या. नंतर त्यात आपल्याला हवे तेवढे सरसरीत होण्यासाठी पाणी घाला. त्यात मीठ तिखट चवीप्रमाणे घालून, बारीक चिरलेली कोथिंबीर घाला. हा रस्सा चांगला उकळल्यावर त्यात वरील मोदक सोडा. गॅस बारीक करुन ५ मिनीटे हे मोदक शिजू द्या.अशी मोदकाची आमटी, गरम गरम भाकरी, त्यावर लोण्याचा गोळा,आणि लसणाची ओली पाट्यावर वाटलेली चटणी अशी सर्व्ह करावी.

दुधी भोपळ्याची भाजी.

दुधी भोपळ्याची भाजी.
१)मूठभर हरभरा डाळ भिजत टाकावी.
२) दुधी भोपळ्याच्या चौकोनी फोडी कराव्यात.
३) कढईत फोडणी करुन, त्यात भिजलेली डाळ नि मिरच्यांचे तुकडे एकत्र परतावेत.
४) आता त्यात भोपळ्याच्या फोडी टाकाव्यात. परतुन झाकण ठेवावे. एक वाफ आल्यानंतर थोडेसे मीठ नि साखर टाकावी. भाजी शिजल्यावर तीत खोबरे, कोथिंबीर घालावी.

टोमॅटो सूप

साहित्य - सहा टोमॅटो उकडून, साखर, मीठ, मिरपूड, खवलेला नारळ, लसूण, कांदा (उभा चिरुन), कोथिंबीर, बटर

प्रथम टोमॅटो कुकर कध्ये उकडून घ्यावेत. नंतर ते मिक्सर मध्ये फिरवून ते गॅसवर उकळायला ठेवावे. त्यात चवीप्रमाणे साखर मीठ आणि मिरपूड घालावी. खवलेला नारळ मिक्सर कध्ये बारिक करुन घालावा. थोडा लसूण घेउन त्याचे बारिक तुकडे करावेत. ते तेलावर गुलाबी रंगाचे होई पर्यंत परतून घ्यावेत व ते सूप मध्ये घालावेत. उभा चिरलेला कांदा तेलावर थोडासा डार्क ब्राउन कलरवर परतून घ्यावा. थोडासा जळाला तरी चालेल. सूपवर परतलेला कांदा आणि बटर घालून सर्व्ह करावे. तळलेल्या कांद्या ऐवजी तळलेले नुडल्स सुध्दा चालतील.

लिंबाचं सरबत

प्रमाण - एक ग्लासास - अर्धे लिंबू, ३ चमचे साखर, चविप्रमाणे मीठ, मिरपूड

अर्ध लिंबू ग्लास मध्ये पिळावं. मग त्यात ३ चमचे साखर, चविप्रमाणे मीठ आणि चिमूट्भर मिरपूड घालावी (जास्त घालू नये). पाणी घालून मिश्रण ढवळावं. मिरपूडीने सरबताला मस्त चव येते.

पालक भाजी

पालक कढईत शिजवणे. (थोडा अर्धवट)

मिक्सर मधून बारीक करणे.

लोण्याची फोडणी करणे. (घरगुती अमूल नाही). त्यामधे मेथ्या टाकून वाटलेले पालक घालणे.

(फोडणीचे इतर साहित्या घालू नये)

सोबत आलं-लसूण पेस्ट, वाटलेली मिरची (तिखट जितके हवे तितकी), २-३ चमचे दही, चवीप्रमाणे मीठ घालून शिजवणे. पनीस असल्यास जरुर घालावे. (पनीर नुसते तुकडे टाकले किंवा आधी बटरवर परतून मग टाकले तरी चालतात.)

* नेहमीची भाजी खाऊन काहीवेळा कंटाळा येतॊ त्यामुळे अशी भाजी जरुर करुन पहावी.