थाई ग्रीन करी

जमवाजमव: यादी बरीच मोठी आहे!

वाटणासाठी: 
भरपूर कोथिंबीर, ४ कांदे,
गवतीचहाची ४-५ जाड धाटे (घरी गवतीचहा असेल तर कंदाच्या बाजूचा जाड भाग घेता येईल नाहीतर  मंडईत गवती चहाचे बिंडे बांधणारे लोक असतात, ते ही धाटे कापून टाकतात, त्यांच्याकडून मिळवता येतील. )
लसूण पात. ही नसेल तर ७-८ लसूण पाकळ्या.
भरपूर आलं. (थाई करीत galangal नावाचा आल्याचाच भाऊ वापरला जातो. तो मी शोधला, पण पुण्यात मिळाला नाही. त्यामुळे त्याऐवजी आलं.)
एका लिंबाचा रस आणि हिरव्या लिंबाची खिसलेली साल. सालीचा हिरवा भाग घ्यायचा. पांढरा नाही. (थाई करीत काफीर लाईमची पाने वापरतात, आपल्याकडे ती मिळत नाहीत.)
४-५ मिरच्या (तिखट चालत असल्या यापेक्षा जास्त)
मीठ, साखर

करीत घालण्यासाठी: 
फ्लोवर किंवा ब्रोकोली १००  ग्रॅम,  पनीर किंवा टोफू, बेबी कॉर्न, आवडत असतील तर मशरूम्स, ढोबळी मिरची,
जर सामिष करी हवी असेल तर वरील भाज्या कमी अथवा अजिबात न घालता त्याऐवजी अर्धा किलो  बोनलेस चिकनचे तुकडे.

याशिवाय, एक ते दीड वाटी नारळाचे दूध, थोडा वाटलेला नारळ, बेसिलची पाने (मंडईत मिळतात) आणि लोणी किंवा तेल.

कसे कराल?

हिरव्या मिरच्या थोड्याशा कोमट पाण्यात ठेवा.
वाटणासाठीचे साहित्य बारीक चिरून घ्या व मिक्सरमध्ये बारीक वाटून घ्या. पाणी लागल्यास मिरच्यांचेच घाला. मिरच्याही बारीक वाटून घ्या. त्यात लिंबाचा रस घाला.
भाज्या उभ्या, मोठ्या चिरून घ्या. पनीरचे चौकोनी तुकडे.
कढईत थोडे लोणी किंवा तेल घेऊन ते तापल्यावर त्यात हिरवे वाटण एक मिनिटभर परतून घ्या. नंतर त्यात भाज्या घालून २-३ मिनिटे परता. चिकन घालणार असाल तर ते थोडे जास्त वेळ परतून,   झाकण ठेवून, पाच सात मिनिटे मंद आचेवर शिजू द्या.
यानंतर नारळाचे दूध घालून, एक उकळी आली की उतरवा.
वाढून घेताना एखादे बेसिल पान त्यावर ठेवा. त्याचा वास करीची लज्जत वाढवतो.


हिरवा डॉट आणि लाल डॉट वाली मंडळी एकत्र जेवायला असतील तर सर्वांसाठी एकच वाटण करून करीतले घटक फक्त बदलायचे.
हिरवेही खुश आणि लालेही!