पुदिना-काकडी

जमवाजमव: 

एक वाटीभर घट्ट दही. आपल्या घरातल्या किंवा विकतच्या दह्यात पाणी भरपूर असते. असे दही एका पांढऱ्यास्वच्छ , सुती  कापडात तास-दोन तास बांधून, टांगून ठेवावे. (यातून ठिबकणारे पाणी  अर्थातच पिऊन टाकावे किंवा स्वयंपाकात वापरावे). असे कापडातले घट्ट दही वाटीभर.
४-५ काकड्या: हिरव्यागार मावळी काकड्या उत्तम. नेहमीच्या खिरा काकड्याही चालतीलच.
वाटीभर पुदिना पाने: आवडत असल्यास जास्तही घ्यायला हरकत नाही.
मीठ, साखर चवीप्रमाणे
आणि हवे असल्यास हिरवी मिरची, जिरेपूड.

कसे कराल?

पुदिना खलबत्त्यात अथवा मिक्सरमध्ये बारीक वाटून घ्या. एका पसरट भांड्यात दही घेऊन त्यात हे वाटण, मीठ आणि साखर कालवा. पुदिना-काकडी सलाड म्हणून हवे असेल तर एवढेच पुरे. कोशिंबीर म्हणून, पोळीला लावून खायची असेल तर त्यात जिरेपूड आणि एक वाटलेली मिरची घाला.
काकडीचे सालासकट काप करा किंवा छोटे तुकडे करून ठेवा. अगदी खायला घ्यायच्या वेळी ही चिरलेली काकडी दह्यात मिसळा. आधीपासून मिसळली तर काकडीला पाणी सुटते, मग घट्ट दह्याची मजा रहात नाही. कोशिंबीर करायची असेल तर काकडी खिसून अथवा चोचवून घ्यायची आणि ती पिळून त्यातील पाणी काढून टाकायचे (काढून अर्थातच ते पिऊन टाकायचे) आणि आयत्यावेळी काकडी दह्यात मिसळायची.
यात आणखी मोडाचे मूग, कांद्याचे काप घातले तरी छान लागेल.