रशियन सॅलड

साहित्य - सफरचंद, अननस, डाळिंब, बटाटे, मटार, श्रावण घेवडा, गाजर
ड्रेसिंग साठी - मेयोनीज, क्रीम, दही, मीरपूड, मोहरीची पूड, चिली फ्लेक्स, ओरेगानो, मीठ
वेळ - भाज्या-फळे चिरणे ४० मि. + उकडणे १८मि. + ड्रेसिंग ५ मि. + एकत्रित करणे ५ मि.
         एकूण वेळ - ५० मि.
किती जणांसाठी - ८

कृती - १) प्रथम बटाटे कुकरमधे उकडायला ठेवावेत. ( भात किंवा इतर काही करणार असाल तर त्यासोबत! :)) उकडून झाल्यावर साल काढून चौकोनी तुकडे (१ वाटी) करावेत.
२) गाजराचे चौकोनी तुकडे करून घ्यावेत, मटार सोलून घ्यावेत, श्रावण घेवड्याचे बारीक तुकडे करून घ्यावेत,
हे सगळे तुकडे प्रत्येकी एकेक वाटी घ्यावेत. पातेल्यात एक वाटी पाणी घालून त्यात हे सर्व तुकडे घालावेत व मंद आचेवर १० ते १२ मि. ठेवावेत. साधारण मऊपणा मोडेपर्यंत , फार शिजवू नयेत. मग बाहेर काढून निथळायला ठेवावेत. ( निथळलेले पाणी स्वैपाकात वापरता येईल. :))
३) सफरचंदाचे १ वाटी चौकोनी तुकडे करावेत. अननसाचेही १ वाटी चौकोनी तुकडे करावेत व एक वाटी डाळिंबाचे दाणे घ्यावेत.

ड्रेसिंग - चार चमचे मेयोनिज + चार चमचे फ्रेश क्रीम ( अमूलचं किंवा घरचं) + चार चमचे घट्ट दही एकत्रित करून फेटावे, मग त्यात छोटा ( तिखट मीठाचा) चमचा , अर्धा चमचा मीरपूड व अर्धा चमचा मोहरीची पूड तसंच चमचाभर चिली फ्लेक्स व चमचाभर ओरेगानो पूड , चवीपुरते मीठ ,घालून एकजीव करावे.

सगळ्या भाज्या आणि फळांचे तुकडे ( प्रत्येकी १ वाटी) एकत्र करून त्यावर ड्रेसिंग घालून व्यवस्थित कालवावे व साधारण तासभर फ्रिजमधे ठेवावे.

नंतर खाण्यासाठी तयार!!
:)